Namangan davlat universiteti

❅

Sifatli ta’lim – kuchli iqtisodiyot garovi

Davlatimiz rahbari raisligida ta’lim sohasidagi islohotlar ijrosiga bag‘ishlab o‘tkazilgan videoselektor yig‘ilishida eng dolzarb masalalardan biri bo‘lgan bitiruvchilar bandligini ta’minlashga alohida e’tibor qaratildi. Unda ta’limni hayotga yanada yaqinlashtirish, bugun talab va ehtiyoj yuqori bo‘lgan ixtisosliklar bo‘yicha mutaxassis kadrlarni tayyorlash, ishlab chiqarish korxonalari bilan oliy ta’lim muassasalari o‘rtasidagi hamkorlikni mustahkamlash, bitiruvchilar bandligini ta’minlash kabi qator muammolar va ularning hal etilishi yuzasidan vazifalar belgilab berildi.

Davlatimiz rahbari ta’kidladilarki, “Odamlarimiz yaxshi yashashlari uchun iqtisodiyotimiz kuchli bo‘lishi kerak. Buning uchun yangi tovar, yangi xizmat, yangi texnologiya kerak. Sifatli ta’lim tizimi orqaligina bunga erisha olamiz. Boshqa yo‘limiz yo‘q”, – dedilar. Biz Davlatimiz rahbari tomonidan belgilab berilgan topshiriqlardan o‘zimizga tegishli xulosalarni chiqarib, vazifalarni belgilab oldik. Avvalo shuni alohida ta’kidlash joizki, yangi oquv yilini mukammal ta’mirdan chiqqan, keng, yorug‘, shinam, zamonaviy texnika vositalari bilan jihozlangan auditoriyalarda boshladik. Bundan professor-o‘qituvchilar ham, talabalar ham va ularning ota-onalari ham juda xursand.

Ta’lim sifatini yanada yaxshilash, talabalar olayotgan nazariy bilimlarini amaliyotda mustahkamlash, bitiruvchilar bandligini ta’minlash yuzasidan aniq chora-tadbirlarni belgilab olganmiz. Yig‘ilishda yoshlar bandligini ta’minlash bo‘yicha tizimni yanada takomillashtirish bo‘yicha aniq yo‘l-yo‘riq va ko‘rsatmalar berildi. Ayniqsa, banklardan ajratiladigan imtiyozli kreditlar miqdorini oshirish, bitiruvchilarni ishga qabul qilgan korxona, tadbirkorlik subyektlariga ham bu borada imtiyozlar yaratilgani muhim ahamiyatga ega yangilik bo‘ldi.

Biz bu yangiliklarni, Davlatimiz rahbari belgilab bergan ustuvor vazifalar mohiyatini professor-o‘qituvchilarga, talabalarga tushuntiramiz. Xullas, bu vazifalarni amalga oshirish yo‘lida fakultetimiz jamoasi bir tan-u bir jon bo‘lib astoydil harakat qilamiz.

Obidxon Xusanxo‘jayev
Filologiya fakulteti dekani